മോടി പിടിപ്പിച്ച
പുതിയക്ലാസ് മുറിയിലേയ്ക്ക്
മാഷ് കുട്ടികളെ കൂട്ടിക്കൊണ്ട് വന്നു...
കുട്ടികളേ, മാഷ് പറഞ്ഞു,
ഈ മുറിയില്‍ ഇനി നിങ്ങള്‍ക്കെല്ലാമുണ്ട്.
നീന്തിക്കളിക്കാന്‍ വെള്ളത്തെക്കാള്‍ മിനുത്ത നിലം.
ഊഞ്ഞാലകെട്ടാന്‍ കമ്പീം കൊളുത്തും.
കളിപ്പാട്ടങ്ങള്‍ക്കിരിക്കാന്‍ അലമാറ.
കാറ്റു കൊള്ളാന്‍ ഫാനുകള്‍...
വെളിച്ചം മങ്ങിയാലിടാല്‍ ബള്‍ബുകള്‍..
അങ്ങനെയങ്ങനെ
കക്കൂസ്... മൂത്രപ്പുര ..
എല്ലാമെല്ലാം ഇതാ ഈ ഒറ്റ മുറിയില്‍...
കുട്ടികള്‍ക്ക് മിണ്ടാട്ടമില്ല.
മുഖത്തെളിച്ചമില്ല..
കൈയ്യടിയും ആര്‍പ്പുവിളിയുമില്ല...
നിങ്ങളെന്തു പറയുന്നു....
മാഷ് കോളറ ശരിയാക്കിക്കൊണ്ടു ചോദിച്ചു,
മാഷേ,
കുട്ടികള്‍ ഒരേ ശബ്ദത്തില്‍ ചോദിച്ചു,
പുറത്തയ്ക്കു നോക്കിയിരിക്കാനുള്ള
ജനാലയെവിടെ?.
ബെല്ലടിച്ചു തീരും മുമ്പേ
എഴുന്നേറ്റോടാനുള്ള വലിയ വാതിലെവിടെ?
No comments:
Post a Comment