ഒരു പൂവുകണ്ടാല്‍
ഒരു മഞ്ഞക്കിളിയെ, കുരുവിയെ,
പീലി വിടര്‍ത്തിയ ഒരു മയിലിനെ കണ്ടാല്‍ ,
ചൂളക്കാക്കയുടെ പാട്ടുകേട്ടാല്‍
ആദ്യം ഉയരുന്ന ചോദ്യം എന്താണ്?
എന്തു വില എന്ന്, അല്ലേ...
ഒരു പാടമോ വയലോ
തുറന്ന ഒരിടമോ
പഴകിയ ഒരു വൃക്ഷമോ കണ്ടാല്‍,
ഒരു മല കണ്ടാല്‍,
സുന്ദരിയായ ഒരു പെണ്‍കിടാവിനെക്കണ്ടാല്‍,
ആരോഗ്യവാനായ ഒരു ചെറുപ്പക്കാരനെക്കണ്ടാല്‍
ഉടന്‍ വരും ചോദ്യം ഇല്ലേ,
എന്തു കൊടുക്കണമെന്ന്...
എന്തു വില തരണം നിങ്ങളുടെയീ ചിരിക്ക്,
ഈ പരിചരണ ശീലത്തിന്,
ഈ മിനുസത്തിന്,
ഈ മണത്തിന്,
ഈ കാക്കപ്പുള്ളിക്ക,് ഈ നുണക്കുഴിക്ക്,
എന്തു വില കിട്ടിയാല്‍ വില്‍ക്കും ഈ ധൈര്യം?
ഈ നട്ടെല്ല് ,ഈ ആനന്ദം, ഉത്സാഹം,
ഓര്‍മ്മകള്‍ തളിര്‍ക്കുന്ന പുസ്തകം,
ഈ സ്വരം...
എന്തു കിട്ടിയാല്‍ വില്‍ക്കും
ഈ തോരാമഴപ്രണയം...
അല്ലേ......അല്ലേ... അല്ലേ....
No comments:
Post a Comment