പങ്ക്

പ്രണയമധുരമുള്ള 
കഥയും കിന്നാരങ്ങളും 
അവള്‍ കൊണ്ടു പോയപ്പോള്‍ 
ഏകാന്തമായ ആ ഒറ്റ വഴി 
എനിക്കു സ്വന്തമായിക്കിട്ടി.


കാടുംമലയും 
കടല്‍ത്തീരവും 
വേലികെട്ടിത്തിരി-
ച്ചാധാരപ്പെടുത്തിയപ്പോള്‍ 
ആകാശമെനിക്കു കിട്ടി. 


സത്രത്തിലെയുറക്കവും 
ഇളം ചൂടുള്ള സ്വപ്നങ്ങളും 
വീതം വെക്കപ്പെട്ടു കഴിഞ്ഞപ്പോള്‍ 
നിലാവു വീണ തണുത്ത രാത്രി
എന്റെ സ്വന്തമായി.


പ്രാര്‍ഥനകള്‍ 
പകുത്തെടുക്കപ്പെട്ടപ്പോള്‍ 
നാല്‍ക്കവലയില്‍ 
ദിക്കു തിരിയാതെ 
അലയുകയായിരുന്ന 
ഇത്തിരിനൊസ്സനെന്നു തോന്നിക്കുന്ന 
ദൈവത്തെ 
എനിക്കു തന്നെ കിട്ടി.