12 Jan 2014

അടയാളം



എന്റെ പേരിടൂ 
വീട്ടുമുറ്റത്തെ 
ഏതെങ്കിലുമൊരു പൂമരത്തിന്. 
അടുക്കളപ്പുറത്തെച്ചിലുകൊത്താന്‍ 
പതിവായെത്താറുള്ള 
ചപ്പിലക്കിളികളില്‍ 
ഇത്തിരിക്കുറുമ്പു കൂടുതലുള്ള ഒരാള്‍ക്ക്. 
നിന്റെ ശബ്ദനിശ്ശബ്ദതകളുടെ 
നിത്യനിരീക്ഷകനായ, 
അപശകുനങ്ങള്‍ ചിലക്കേണ്ടിവരുമ്പോള്‍ 
പല്ലുകടിച്ചു പിടിക്കാറുള്ള 
ആ ആണ്‍ പല്ലിക്ക് .
എന്നും ഗ്യാസ് ഓഫാക്കിയിരുന്നോ 
താക്കോല്‍ തിരികെയെടുത്തിരുന്നോ 
എന്നൊക്കെ സംശയിച്ച്
ഇത്തിരിക്കൂടി അധികനേരം 
നിന്നുപോകാറുള്ള 
മൂന്നാമത്തെ ചവിട്ടുപടിക്ക് 
എന്റെ പേരിട്ടുവിളിക്കൂ...

No comments: