21-Apr-2013

മനോചികിത്സയ്‌ക്കൊരു ലൊട്ടുമരുന്ന്

അകാരണമായ 
ചില ആകുലതകളില്‍പ്പെട്ടുഴലുമ്പോള്‍ 
ശീഘ്രശമനത്തിന് ഒരു ലൊട്ടുവിദ്യ പറയാം. 
ആദ്യം ഇരുകാല്‍ നില്‍പില്‍ നിന്ന് 
കൈയ്യിലും കാലിലും താങ്ങിയുള്ള 
നാല്‍ക്കാല്‍ നില്‍പ്പിലേയ്ക്ക് മടങ്ങുക. 
ഉയര്‍ത്തിപ്പിടിച്ച കുന്തവാല്‍ക്കൊടിമരം താഴ്ത്തി 
അറ്റത്തെ ദേശീയ പതാകയഴിച്ചു മാറ്റുക. 
പീലിവാലറ്റമുരുമ്മി മണ്ണു മുട്ടിക്കുക. 
എവിടേലുമലഞ്ഞിത്തിരി-
പ്പുല്ലോ ഇലയോ മേയുക. 
അരുവിയിലിറങ്ങിയൊരുതുടം 
വെള്ളം മോന്തുക. 
പള്ളയില്‍ത്തലചായ്ചു കിടന്നിത്തിരിയയവെട്ടുക, 
ഇത്തിരി മയങ്ങുക, 
പിന്നെ 
അന്തിയിലേയ്ക്കാഴുന്ന ഊടുവഴിയില്‍ 
ഇരുളുപടരുന്നതുകണ്ടൊന്നു ഭയക്കുക,  
അമ്പേയെന്നൊന്നമറുക...


No comments: