എതിരര്‍ദ്ധഗോളത്തിലെ
കാക്കയ്ക്ക് പൂച്ചയ്ക്കണ്ണാന്
മിണ്ടാന്‍ മനുഷ്യരെപ്പോലെ
വേറെ ഭാഷകാണുമോ?
അവിടുത്തെ കാറ്റിന്‍ നട-
യിങ്ങേപ്പോലന്തിക്കള്ളു
മോന്തിയ മട്ടുതന്നെയോ?
തിരത്തള്ളലാറ്റിന്നൊഴു
ക്കൊക്കെയും വ്യത്യസ്തമോ?
കുരുവിപ്പിടപ്പെണ്ണിന്‍
വാലിന്റെ ചാഞ്ചാടിക്കല്‍
കുളക്കോഴി, തവളപ്പേച്ച്
ഒക്കെയും ഇതുതന്നെയോ?
മഴയ്ക്കും വെയിലിന്നും
മുദ്രകള്‍ വേറെയാകുമോ?
കുഞ്ഞിക്കിടാത്തന്മാര്‍
മഞ്ചാടി പെറുക്കുമോ?
പാവയെ കുളിപ്പിച്ചൂട്ടി-
പ്പിടിച്ചൂട്ടിയുറങ്ങുമോ?
രാത്രിയില്‍ ഒറ്റപ്പെട്ട
പാതയില്‍ പിശാചുക്കള്‍
ദൈവങ്ങള്‍ സന്യാസിമാര്‍
നടക്കുന്നുണ്ടാവുമോ?
മരിപ്പിന്‍ കാവ്യനീതിക
ളങ്ങിങ്ങുമൊന്നുതന്നെയോ?
അറിയില്ലെനിക്കൊന്നും
ഞാനിപ്പൊട്ടക്കുണ്ടില്‍
വിതയും കൊയ്ത്തും തീര്‍ത്തു
രമിക്കാന്‍ നേരമില്ലാത്ത
പഴേ വയല്‍പ്പണിക്കാരന്‍.
No comments:
Post a Comment